Murraysburg boekklub – Oktober 2021

Murraysburg  –  October 27, 2021

 

V.l.n.r Maryn de Klerk, Penny Rodel, Carike Nieuwoudt, Luané McLachlan, Lindie Venter, Linda van den Berg, Magda van Heerden, Theresa Troskie.

Artiekel deur: Theresa Troskie

Op 7 Oktober het die Boekklub weer ouder gewoonte in die Ou Waenhuis, koffiewinkel van Maryn de Klerk,  bymekaar gekom vir ’n aanbieding.  Magda van Heerden van Weltevrede was aan die woord.

Met die aankoms het elkeen ’n nommer getrek en is ons daarvolgens in 2 spanne verdeel.  Ons almal is bewus daarvan dat skrywers deesdae al hoe meer en al hoe meer dikwels kragtaal, vloektaal en selfs die ydellike gebruik van die Here se naam in boeke gebruik.

Die 8 teenwoordiges het ’n debat gehou oor:  Die gebruik van kru taal/vloekwoorde en die Here se Naam om geloofwaardigheid en oemf aan literêre werke te gee.  Die inleidende span het  VIR  die onderwerp gepraat en die opponerende span  DAARTEEN.  Wat ’n lewendige, lekker bekgeveg was dit nie?!

Dit was baie insiggewend om almal se uiteenlopende opinies oor hierdie omstrede onderwerp te hoor.

Hierna het Magda ons op ’n reis geneem met haar goed nagevorste, kundige aanbieding van boeke uit verskillende génres:

Donkerdrif  –  Deon Meyer

Die Heelal op my tong  –  Anoeschca von Meck

The silent treatment  –  Abbie greaves

Me before you  –  Jojo Moyes

Soos elke maand, was hierdie boekklubbyeenkoms weer vir ons die hoogtepunt van die maand!  Ons is geestelik verryk daar weg.